اعتذار

بسم الله الرحمن الرحيم

أخواني ,,

أعتذر لكم عن الغياب المفاجئي والي كان خارج عن إرادتي

والي كان لأسباب أهمها الوعكة الصحية والامتحانات

وإن شاء الله بحاول أحط بوستات بشكل يومي في الأيام الياية

مع أن احس فيني فراغ بلوغري

My new mobile

بسم الله الرحمن الرحيم

بعد ما خرف تلفوني القديم وقام يقط خيط وخيط

وبعد ما اكل عليه الدهر وشرب وتغدى وتعشى

لدرجة انه طفى بويهي فجأة وما رضى يتبطل

انا شكيت بالأول انه كان معصب وزعلان

لكن طلع فيه خلل فني وديته المصلح

قال تصليحه بـ 15 دينار

قلت خلاص زلقة بطيحة دام ان تلفوني قدييم ومستهلك وريله والقبر

اشتري لي تلفون يديد

شريت لي Nokia N79

الصراحة تلفون فوق الممتاز

فيه مميزات وايد حلوة

والي عجبني منها أن معاها ثلاث كفرات

مجرد ما نغير الكفر يتغير لون الخلفية

والسلام خير ختـآم

من هنا وهناك

تحديث :

وأخيرا قوقل الكويت

http://www.google.com.kw/

====================================================

بسم الله الرحمن الرحيم

تماشيا مع قلة بوستاتي المطروحة

ومع طول الفترة التي لم اضع بها تدوينة

قررت أن اضع سوالف وتمتمات

=============================

احس قالب المدونة مو عاجبني

منو يتبرع لي

ويعطيني قالب على ذوقه

============================

أزمة المواقف عندنا مطلعة مرارتي

وباطة جبدي

أطلع دقيقتيين برى البيت بالسيارة

ما أشوف إلا الحبايب سافطيين مكاني

==============================

ما ادري متى يخلصونا من بيوت العزوبية

الحين العزوبية محددين لهم مناطق

مثل حولي و جليب الشيوخ

شحقة اييون لنا بالعاصمة وينغصون علينا عيشتنا

==============================

ظاهرة منتشرة بالآونة الأخيرة

ألا وهي ظاهرة الـ emo

ناقشت أكثر من واحد حول هذه الظاهرة

كل الي ناقشتهم يدافعون عنها دفاع مستميت

بحجة الأسم فكلمة أيمو

أختصار لكلمة emotinal

فهم اتبعوا هذه الظاهر

كونهم عاطفيين

ولديهم كآبة وحزن دائم

غاضين ابصارهم

عن نمط لبسهم

وثقافتهم

الآتية من الغرب

===========================

يقبعون خلف أقنعة

أقنعة مزيفة

كاذبة

مخادعة

وعندما يحين الوقت

لسقوط هذه الأقنعة

تظهر نواياهم

ينكشف ما في سرائرهم

فتوضح امامنا

صورهم البشعة

الشريرة

المخادعة