الجمعة، ٣١ أكتوبر ٢٠٠٨

skin walkers


بعد أسبوع دراسي طوييل
وحافل بالعديد من الامتحانات وعوار الراس
ها قد أقبل الويك ان
طبعا كنت حاير
وين اروح وين اروح
دخلت موقع السينما
علشان اشوف شنو في أفلام
وانا فاتح الموقع ولا يفصل النت علي
وبعد تفكير جهيد
قررت اني اروح الافنيوز
اشوف شنو في افلام هناك
كنت انا مقرر على eagle eye
بس ما ادري شسالفتي مع هالفلم
ثلاث اسابيع كل ما بروح حق هالفلم
يا ما في كراسي
يا وقته متأخر
حجزت على فلم skin walkers
ما حصلت كرسي إلا جدام كلش
يم الشاشة
وهني صارت لي مصيبة ثانية
انكسرت رقبتي وانا احرك فيها علشان اقرا الترجمة
وما اشوف شي من فوق
بس مركز على الترجمة
ما فهمت شي من القصة
وبنات ورة مأذينا
على كل شي يضحكون
بالنهاية
حرمت اني اطب الافنيوز مرة ثانية
تحديث :
راح انقطع فترى عن التودين
بسبب الأمتحانات
ادعوا لي بالتوفيق

السبت، ٢٥ أكتوبر ٢٠٠٨

كان ,,, وصار

بسم الله الرحمن الرحيم
كنا
نقلب الدنيا إذا شرينا تلفون
صرنا
كل ياهل بيده بدال التلفون اثنين وثلاث
كان
الأيميل شي إعجاز إذا سويناه ال
صار
حتى بو شهر ونص عنده ايميل
كانت
المنتديات للمبرمجين
والخبراء بالكمبيوتر
وصارت
المنتديات تصير عند الواحد اول ما يصير عنده جهاز
كنا
نحس بالفرحة إذا حصلنا دينار
صرنا
حتى العشرين ما نحس بطعمها
كنا
نتشقق من الوناسة إذا شرينا سوني
صارت
السوني شي ضروي مع البطاقة المدنية
حتى لو كنا ما نحب نلعب سوني
كنا
نجتمع يوميا أو اسبوعيا
صرنا
ما نعرف بعض إلا بالمناسبات
كنا
قلوبنا مع بعض على رغم المسافة بينا
صرنا
قاعدين يم بعض
ولا أحد داري عن الثاني
كان
الفريج كله متواصلين مع بعض
والعلاقة الي بينهم أكثر من اخوة
صار
حتى المؤجر الي يسكن في بيتنا ما نعرف اسمه
كنا
نجتمع اجتماعات اسرية
ونسولف مع بعض وكل واحد ياخذ ويعطي مع الثاني
وصرنا
حتى اعمار آبائنا ما نعرفها

الجمعة، ٢٤ أكتوبر ٢٠٠٨

:مزاجي:


مزاجي اليوم :
زهق + ملل +فياخ

الجمعة، ١٧ أكتوبر ٢٠٠٨

من كل بستان زهرة

بسم الله الرحمن الرحيم

تزامنا مع طول الفترة التي لم أضع بها أي موضوع جديد

قررت أن اضع لكم حكايات و فضفضات من هنا وهناك

=======================================

منو فينا ما شاف اللوحات الألكترونة الي بالشوارع

كلنا نشوفها

بس ما نقدر نقرا الي فيها إلا لمن نوقف

وبعدين لمن نوقف ونشوف شنو مكتوب فيها

مكتوب لا تنشغل بغير الطريق

واساسا الي قاعد يقراها مشغول بالي كاتبينه

يعني الصرااحة عبقري الي مسويها

==========================

القطاوة الي بفريجنا مأذيني

أكثر فريج بالمنطقة كلها فيه قطاوة

والمشكلة ان فوق شينهم قواة عينهم

أكثر من مرة ادش البيت اشوف قطاوة منسدحين على الزرع

ويطالعونك من فوق لتحت جنك مو عاجبهم

ومرة وحدة مولدة عيالها عندنا البيت

ما ادري بيتنا مسوينه فندق

ولا مستشفى ولادة

====================

موضوع تكلم عنه الأخ كويت ماستر

وهو حجب موقع السكايب

انا سمعت السبب من واحد

يقول ان اغلب الكويتيين

قاموا يتوجهون لي السكايب

لأنه ببلاش

علشان يكلمون أهلهم

ولا ربعهم الي برة

فهذا الي خلاهم يحجبونه

علشان يخلون الناس يستخدمون الصفر الدولي

ما ادري إذا كانت هالمعلومة صحيحة ولا لا

لكن ما استبعد هالشي

وحبيت أضيف ان مو بس موقع السكايب محجوووب

وايد مواقع ما فيها شي مخل بالآداب محجوبة

ذيك المرة كنت ابي شغلة حق منتداي

دخلت منتدى تطويري ولا حاطين لي الصفحة الشهيرة الموقع محجوب


======================

باركوا لي

نجحت بإنتخابات المدرسة

للجنة الثقافية والاجتماعية

وأي واحد عنده معاملة انا امشيها له :P

===========================

لي متى يا حكومتنا الموقرة

مو لاقية حل حق مشكلة العزابية

يعني الحين معروف العزابية لهم مناطقهم

الي اهي حولي وخيطان وجليب الشيوخ

ليش أييون بمناطقنا ويأذونا

لا تشوفون منطقتنا متروسة هنود

واحد يأجر بيت حق هندي وزوجته

على بو انهم مو عزابية

والباجي كلهم عزابية

أرجو انكم توقفون وقفة صارمة علشان تحدون من هالمشكلة

واليوتيووب قريبا بيحجبونه
==================================

يمكن انقطع عنكم الأسبوع الياي

لأن جدولي مزحووم

كله امتحانات

ادعو لي بالتوفيق

===================================

الديرة ازدحام في ازدحام

ومشكلة ثانية عندنا بعد بمنطقتنا

مشكلة المواقف

و الشوارع الي عندنا ضيجة

ما تمشي فيها إلى سيارة وحدة

===================================
الطائفية هالأيااام مشتدة عند حدها

ويتمثل لنا هالشي

بالمواقع السنية والشيعية

الشيعة يخترقون مواقع السنة

والسنة يخترقون مواقع الشيعة

هذا غير القتل الي بالعراق بين الشيعة والسنة

يعني لي متى هالطائفية
==============================

هذا كل الي عندي الحيين

وبس يطلع أي شي مستجد

بسوي تحديث في هالبوست

وسامحوني ع الإطالة

====================================

تحديث :

أمس كنت رايح معرض العقار في أرض المعارض

شفت شي غرييب

أغلب المشاريع برة الكويت

وأغلبها بعماان

اتوقع بيغيرون أسم عمان بيسمونها جمهورية عمان الكويتية المتحدة



الأحد، ١٢ أكتوبر ٢٠٠٨

without adress

بسم الله الرحمن الرحيم

عند ذهابي للمدرسة واستماعي لتغريد المدرس بالقوانين

ينبعث في نفسي شعور السخرية والضحك

فالقوانين الموضوعة كلها قوانين - غبية - ولا تمت بتاتا بأي صلة من الصلات للمنطق

حينها فقط أدرك أن من وضع هذه القوانين من - أغبى المخلوقات -

وأنه لا يفكر بمنطق

لكنه يفكر فقط في تحسين صورته بأنه منضبط وملتزم

رغم كون هذه القوانين الموضوعة من المدرسة نفسها

وليس من الوزارة

سأطرح لكم بعضا من هذه النكات ( القوانين) لتشاركوني الضحكة :

التلفون ممنوع

شعر طويل ممنوع

بنطلون ضيج ممنوع

بنطلون رمادي فاتح ممنوع

فنيلة بدون غولة ممنوع

دلاغ قصير ممنوع

طلعة بالخمس دقايق بين الحصص ممنوع

تروح الحمام (وانتوا بكرامة) بالحصة ممنوع

تاكل برا المطعم ( المقصف) ممنوع

فنيلة فيها كتابة ممنوع

جل ممنوع

جنطة عليها رسمة ممنوع

جوتي غير اللون الأسود ممنوع

وغيرها الكثير الكثير

وهذه القوانين كلها على سبيل الحصر لا المثال

سؤال : ما ادري ليش يمنعون انه يطول شعره او يلبس فنيلة بدون غولة

يعني هذا بيأثر على الصرح التربوي و التعليمي

ولا بتنهدم المدرسة

السبت، ١١ أكتوبر ٢٠٠٨

اكتشاف عظيم + الخردة




بسم الله الرحمن الرحيم


اليوم كنت طالع مع الوالد


وعلى طريج رجعتنا للبيت قررنا نطلب من مطعم


فكرنا من شنو نطلب


وكانت اقرب منطقة لنا بنيد القار


قررنا نطلب من بدر البدور


واول ما دخلنا فريج مطعم بدر البدور


شفت مكانه لوحة حمرا


قلت شالسالفة يا با نوراما


حطوا بداله مطعم ثاني


قربنا صوب اللوحة















قريت مكتوب عليها بذر البذور والنقاط حاطينها كبيرة







قلت اكيد هذا مطعم ثاني







دخلت المطعم ولا أشوف نفس الموظفين الي يشتغلون فيه







دخلت طلبت







وطبعا من باب الفضول الي فيني







رحت سألت الي يشتغل







شنو اسم المطعم ..؟؟







وفوق راسي مليون علامة استفهام ( ؟ )







قال لي بذر البذور







وحسيت من نطقه يشد على حرف الــ ( ذ )







قلت له شنو السالفة غيرتوا اسم مطعم







قال هذا في شركة غير الحيين هوا يغير اسم







الترجمة : ( في شركة ثانية مسكت المطعم واهي الي غيرت الأسم )







حسيت ان الإجابة ما تشبع فضولي ولقافتي







سألت الثاني ليش الاسم غير ؟؟







قال هذا من 20 سنة هوا نفس اسم بس نقطة مال ( ذ) ما في بين







الترجمة : { المطعم من 20 سنة أسمه بذر البذور بس كانت النقطة صغيرة ماتبين }







طبعا خذيت الطلب ومشيت




====================================






هذا مشروع استثماري بحت

هذا وانا كل يوم اروح الجمعية او الفرع

إذا رجعوا لي الباجي خردة

احطهم بالدرج

وهذي الحصيلة لحد الآن

ما يستفاد : إذا شفتوا اي اسم دققوا فيه ,

لا تستهينون بالــ 100 فلس 100 على 100 تسوي عمارة













الأربعاء، ٨ أكتوبر ٢٠٠٨

طالب منغث

بسم الله الرحمن الرحيم

تزامنا مع انتهاء عطلة العيد وبدأ الدراسة من جديد

قررت ان اكتب الحادثة التي - غثني - في صباح هذا اليوم

اليوم الصبح تقريبا الساعة 7:30 كنت بالمدرسة

اول ما وصلت قالوا لي ادخل من الباب الثاني الي يودي المسرح

لأني متأخر

دخلت من الباب _ ما ادري ليش كتبتها طالب_ الثاني ولا أشوف نص المدرسة متأخرين

كل واحد سجلوا تاريخ التأخير يم اسمه

المشكلة مو هني

المشكلة ان المتأخرين

عندهم أعذار

واحد من الطلبة قال انا ابوي يقطني عند القادسية وايي مشي لي المدرسة - طبعا المدرسة بالدعية -

رد عليه الوكيل بكل بروود

مو شغلي

قول حق ابوك يوصلك لي المدرسة

وواحد قال له كان ابوي تعبان شوي فأضطريت ادق على تكسي وايي

رد عليه الوكيل ليش ما دقيت على التكسي مبجر

يعني المفروض يقدر ظروفه

ويسامحه بس هالمرة

طبعا الي متأخر مرة وحدة مشوه

والي متأخر مرتين وانا منهم - احم احم -

قالوا لهم تعالوا غرفة الأخصائي علشان نعطيكم تعهد

رحنا غرفة الاخصائي

ساعتها هني انغثيت حدي

دخلت ام واحد من الطلبة على غرفة الأخصائي

قالت لا توقفونه خلوه يمشي

قال لها خلاص حاضر

وراح صفه ولا جنه شي صاير

اهني صج انغثيت وانبطت جبدي

وطبعا بدون ادني شك لازم يأخرونا عن الحصة

ما ادري المدارس حق التعليم ولا حق العقاب
===================================

في أعتقادي انه يجب تغيير مسمى وزارة التربية إلى وزارة التعليم

ففي نظري ان المدارس هي رمز الفساد

فكم من شخص قد دخل المدرسة وهو في أوج الأدب والأخلاق وخرج منها وهو - أكبر صايع -

هذا بالإضافة إلى اهتمام المدرسين على التعليم فقط

واهمال الجانب التربوي والاخلاقي

بل وقد يكون المدرس هو من ساهم في اندحار الأخلاق في الطالب

فكم رأيت من مدرسين يوجهون المسبات إلى الطالب

وينهالون عليه بالإهانات

فقط لأنه مدرس

وان الطالب (المغلوب على امره) يجب عليه ان يسكت ولا يرد عليه

وإلى اللقاء في بوست آخر